Just another WordPress.com site

Chens d’a sierra

Que seiga bueno

 

224.JPG

Que seiga bueno l’orache ta ra chen con rasmia

129.JPG

que d’a fosca tierra quita l’augua y fa lumbre,

318.JPG

                         u en o rudiosa margen mana paz.                                 

                                                                                     Sagardiana   


De l’albandono

 

albandono.JPG 

 

Maitín furtau a retepelo.

Sonata de binagre.

 

Quera que s’ha metíu

n’a fosca guambra

d’iste casal sin d’asperanza.

 

Nuei escura y batalera

d’as bentanas sin mirada.

Nana de cal biba.

 

Albada con piez d’arena.

Enruena.

 

                          ………………………                          

 

   (En o termino de Nozito, camín de Lasaosa…unatra pardina escachada)

                                                                                             Sagardiana

 


Pardos d’Arpán

 

De maitíns ye royo l’aire n’o cobalto d’os altarios puertos

y o meyodía torna cada día en azulenco

o zielo acarrazadero de Guara.

 

Marchan os autos y os menutos d’o sieglo bente y uno

asinas mesmo a teña, uno dezaga de l’atro.

 

Os chinepros de Mallata en o lugar de Lezina

s’enredan con as sabinas d’os nuestros debampasatos.

Y enta puerto marchan os suenios d’os pardos d’Arpán

adormitos en iste amprato ta cutio.

………

 

De “Pardos d’Arpán”

O manantial de Sietemo, 2003

 

 

                                                                                          Sagardiana

 


Bolaco, l’au nigra

 

c1.JPG

 

Bolaco que en portas l’anima entalto.

Enta os fenals y os praus, por as tucas grisas

por a soledá d’os puertos;

d’os míos güellos ranca la luz zaguera.

Y con o tuyo bolito 

endreza por l’aire d’a tierra

a mía bida benidera,

o mío nuebo camín. 

 

………

Si en hay un au, predileuta ta yo, ixa ye o bolaco.

Cuan yes por as tierras altas, a suya boz crebán lo silenzio, ye machica. No en hay soníu tan clatero como ixe.

Y si son callaus…l’aire charra por éls, cuan chufla fosco por as suyas plumas alars.

Ye cuasi que una canta a ra libertá. Cuasi.

Cuan siga grán…quiero estar bolaco.

 

                                                                                         Sagardiana

 


Bibir…ye

119.JPG

… sólo que andar

213.JPG

y bier

310.JPG

todo  lo más que’n podamos.

 

 

 

(Adeducau ta la mía mai, que güé por primer bez, ye estata n’o  dolmen de Ibirque, a tierra d’o suyo güelo)

 

                                                                                             Sagardiana 


Aqueras Montañas

Ta iste Chulio
que campa con a calor a cuestas…
una miajeta de Montaña
y de nieu.

A la buestra salú, ista canta
que ye… a nuestra canta.
                                                 Sagardiana

 


Piedra rayo

piedra-rayo.jpg

 

Piedra rayo, ta espantar as cendellas n’as tronadas.

Cuan plegón os primers abitadors por istas sierras prexino que l’ambista yera diferén…encara que, por suerte u por disgrazia, dende a Pardina d’a Garoneta de Rasal enta os feners de Bara, as bals y semontanos d’as caras puerto d’as sierras esteriors pirenencas, parixen ficadas n’os tiempos d’antismás. 

Ta muestra iste botón: No fa muito que plegó a luz enta Nozito…no ye mentira, no.   

Con o turismo rural, y as ganas que a chen en tien de marchar d’as ziudaz, os días de l’estiu y muitismos cabo semana, as eras y os ortals s’implen d’abitadors y besitans.

Al amparo d’as piedras rayo, as tiñas escachadas, aguantan o temporal. 

A chen d’a sierra, alza n’a memoria sieglos de conozimiento e superstizións.

Igual te mete una piedra rayo, n’a punta chaminera, que unas estijeras d’enzima o calibo y a zenisa d’o fogar, que una piedra modorra n’o portalón d’o cubierto d’as parideras, que un ramer de bucho en un foratizo entre as parez d’as bordas…

A primer bista, isto puede parizer una fateza, pero no i ye asinas…

Se’n tomaban muita faina ta replegar piedras d’istas…Tan de seria ye la cosa como que a piedra modorra no se’n podeba replegar en os campos de uno, no. Tenebas que írtene luen…y dimpues meter-ne n’os corrals.

O ramer de bucho, ebas de replegar-ne n’a nuei de San Chuan.

As estijeras, eban de dejar-ne ubiertas, fendo a forma d’una cruz.

En istos países as piedras han estau emplegadas, no solo que d’alazet de casas y tapials, adoquins ta os camíns u ruellos…

En as sierras de Gratal y Guara as piedras tienen o poder d’a machia. De chenerazión en chenerazión, os abitadros ban alzar a sapienzia d’os primers abitadors. Aquers cazataires nomadas que plegón t’astí, por os camins d’o Pireneo.

A piedra rayo, a piedra modorra, as tres pedretas, a piedra espantabrujas, as piedras de seguntes que manantials, os muntonez de piedras siñalán o lugar en do ficar presens ta os santos u os dioses, as piedras adintro d’as tenajas, ta conservar l’augua…

Y asinas pasan os sieglos por as bals y os lugars, repelgando nuebos conozimiens sin sublidar, nunca no, que i somos astí, en o mesmo terreno que ers…

Ers, os primers abitadors d’istas sierras, os fazedors d’as piedras rayo, os ombres preistoricos, os nuestros debampasaus en o que a ocupazión de suelo pertoca.

 

                                                      sagardiana 

 

 


Ta la chen d’a Bal d’a Garona

bal-da-garona.jpg 

 

A l’augua que baxa, d’as sierras t’a mar…

A l’augua que’n torna d’a mar, con as plebias.

 

A l’augua que corre cobaxo d’as piedras…

Sierra de Lobarre, Sierra de Chabierre

Sierra Caballera.

 

A la canta d’os manantials.

Al barranco San Martín.

A la Fuenfría.

Al peine d’a mora d’a Birchen d’os ríos.

Al Alacay, chardín de molsa entre caxicos. 

 

A  l’agua salada que as mullers i ploran…

Sin d’ombres…silenzio n’as güertas;

ni albaca, ni lidios, ni ramez de rosas.

 

 A las glarimas d’as lolas

que’n boiras guallardas por Bentué y Rasal

implen as pauls y los caños d’agua.

 

A la chen d’as sierras que aguantan de pie

na tierreta mía, a Bal d’a Garona.

 

 

                                                                                    Sagardiana

 

 


Caseta de broxas, Ibirke – Bilque – Ibirque

caseta de broxas

Dolmen neolitico, en o camín que tira enta Ibirke, u Bilque, u Ibirque, de todas istas trazas ha estau nombrau.

Dende Nozito, a poquets metros de l’esbarre, que te diz: U ta Belsué u ta Lasaosa…

Un tresoro nuestro y de toz os que biengan por astí, plantau debán d’o tozal de Guara, n’as güegas d’o lugar, en tiempos abitau, más altero d’a Sierra.

Unatra caseta de broxas en tierra de pastors pirenencos. 

                                                                                    Sagardiana