Que seiga bueno
Que seiga bueno l’orache ta ra chen con rasmia
que d’a fosca tierra quita l’augua y fa lumbre,
u en o rudiosa margen mana paz.
Sagardiana
As paxaretas de mai
Se dizen «lavandera blanca», en luenga castellana
por Aragón belgunos les ne dizen «engañapastors»
A mía mai les dize «paxaretas d’as nieus»
Por a laberca de Loreto, en una tardi con a mía mai que m’en dizió: «fa un retrato a ixas paxaretas d’as nieus, que i son prou pinchas astí plantadas»
Sagardiana
Marzo por a Guarguera
Bienplegato sigas, bucho;
ista ye a casa tuya.
Bienplegata sigas, garrapescaire;
ista ye a tuya ripera.
Bienplegata siga a tuya buelta,
premabera.
Sagardiana
Regles d’a Lei natural
Güé ye o cabo d’año de Felix Rodriguez de la Fuente.
Quiero meter astí ro mío omenache a ra suya presona, cuala fizo que yo mirase ro mundo que me arredolaba d’atra traza.
Felix, con as suyas imachens y parolas, ficó en mí l’angruzia por estar-me ta cutio en o monte, con güellos y orellas prestos.
Memoria ta él y ta tantos atros que fizón que a chen parase cuenta d’os tresoros que en habemos n’a Tierra.
Sagardiana
De cara t’a premabera
Cosa s’atura n’o mundo
zinclean os planetas;
s’enzelan.
Alufrán l’orache, miran
de meter en o tiempo danzaire
trangos nuebos.
Cosa s’atura en cada planeta;
zinclea o tiempo.
………
Laberca de Loreto en a tardi d’o 6 de marzo, a 15 días d’a premabera. As aus tienen prou de faena, parando niedos.
Sagardiana
Gabinas n’o suenio
Ista begata ra bista no engaña.
Sí?
No?
Conzietos de guambra,
de ilusión no pasan.
Sólo que luminetas son
ta iste corazón que aguarda.
As gabinas patiamariellas son retratadas en a laberca de Loreto, a tarde que a borrasca Xynthia pasaba por astí.
Sagardiana
Paso de grudas por Loreto
Azul, azul, azul está la tarde…
Se siente a boz d’as grudas.
Bolito, plumón y canta biachers
cara puerto.
China chana bolán, bolán, bolán…
Mirán de i plegar, pase o que pase.
Azul, azul,
l’orache yera güé tan de azul…
Sagardiana
Simpla de bibir-ne
Tan simplo ye bibir
como danzar sin prisa
a la traza d’as bombollas.
Como cantar a misma canta
que as chislas d’a plebizna cantan.
Tan simplo como naxer al punto el día
con ganas de marchar una miqueta más,
anque albitrios y consumos faigan
que de pintacoda rematis n’a tardada.
Tan simplo como luitar
ora par d’atra,
y capir toz os intes de buen implaz.
Porque son l’unica cosa que’n habemos.
Y anque embolicata en bienga la chornada
si femos os posibles, será simpla de bibir-ne.
……………………..
Os retratos de augua son d’a Laberca de Loreto en ista tardi de febrero plebiznero.
Lo paxaro ye un esparbel que acucutaba dende a linea de tensión de Cuarte.
Sagardiana
Sin d’endreza ni siñals
A paso menudo
y güellos pasachers,
por as margenes de l’augua;
como as aus d’a laberca, si podiese
sin d’endreza ni siñals,
marchar…
Sagardiana
Rosada n’a Guarguera
Biene a rosada,
con as mans de chelo.
Con a mantilla blanca
d’os días frios,
amorosía n’as berdas fuellas,
d’os chinepros
chupitos rezos
y cantas tobas.
A mañanada, ranca con oras
y o esdebenir ancolinquetas.
China-chana, s’endrezan
os camins d’o meyodía
y cosa no xorronta ixa falaguera
que inamorada, d’a sudor d’o suelo,
de cada gota d’agua
fa una rosa.
Conbidada en ista puenda grisa
no rebla la color d’a molsa…
A selba, con l’espritu d’a fridor
s’emplena de silenzio,
de bozes que n’iste agüerro
cantan en a ribera.
Por territorios de cosas simplas,
magenzia, en cada palmo tierra.
Glarimas que de goyo
u penar serio,
amuestran firme, a consistenzia d’o ser
que n’iste orache, en torna
por cada nueba nafra,
zentenas de flors chelatas
y por duelos inombraples, bidres
que por as sompras
esluzernan.
Sagardiana
Aineto, molsa e augua
Aimors d’encantaria,
molsa d’os cajicos.
Carizias n’a piedra,
dende Aineto baxan.
Marchan enta’l Guarga,
con a nieu
e l’augua.
Sagardiana
Amo ibierno
Pardo l’orache, boiras grisencas.
Fridor aimada,
primera nieu.
Bas plegar
enta iste puesto d’aügua,
que, ta tu, parada
reza:
«Amo ibierno,
toma de l’agüerro
a tuya pertenenzia».
Sagardiana
Ta la fuén s’amanan
Ta la fuén que, xuta,
s’enlamina con o zillo
que promete plebia,
o gurrión
de ziudá y de canalera,
s’amana.
Y a paloma…
que rechira también augua
por carreras abitadas.
sagardiana
Plega l’agüerro, con a zaguera luz de setiembre
Aurín n’as fuellas,
ulor d’agüerro
que l’augua en porta,
bal t’abaxo
y en as yerbas xutas,
s’apedeca.
Aurín, n’as nanas
d’a chunguera
y n’os lulos royos
d’a gabardera.
Aurín qué,
setiembre adora,
por os suelos
a simiente acuna.
A boz d’a plata,
d’aimors con l’estíu,
cariños en a balsa,
plora.
Plega l’agërro
y o frío plega.
Plega la mansa
y toba
siñal que,
a puenda que se abiene,
nueis de zierzo
y plebias, nunzia.
Sagardiana
Laberca de Cortés
Laberca de Cortés
al canto de Chimillas
en a Plana de Uesca.
Garrapescaires y anedas
que s’amagan
(ta que no les ne beigas).
Gabinas…
que implen l’azul d’a laberca ,de blanco
pardo y griso.
Y en as zentenas de plachas
que a calor de l’estíu
ba dexán…
correlimos?
y engañapastors
que se pasan a tardi
rechirando’l buro, mirando cucos.
Cuan l’aigua d’a Isuela baxa d’Arguis,
son por astí de paso…
como yo.
Solo que antonces.
Sagardiana
Atro día en a laberca
Ista tardi feba muitismo aire por a laberca.
Pensé: mal orache ta fer retratos…
encara qué l’arnalero quereba en fer-se uno
Dimpués, una bolandrina, de cara’l zierzo
en iba escapada, d’astí t’allá
bien pincha
Al rato, plegó un biello amigo d’iste ibierno…
l’albardero que’n pasó con yo muitas tardadas de frío
L’aire no paraba…
y os paxaros tampoco no se estaban miaja de quietos.
Ista…creigo que ye una cardelina, encara qué
an ido a parar as suyas colors d’agüerro?
Al canto’l augua…un chorlito buscaba cucos.
Y yo, chorlitos ta retratar.
Al punto marchar, alcontré un tresoro:
o mochuelo…
acucután.
En una tarde d’aire en Loreto…
Sagardiana
Laberca de Loreto…abentura cutiana.
Astí deban, asti mismo
n’hay una abentura..,
no cal marchar muito luén.
Al canto Uesca…
As bolandrinas campan a raso l’augua,
en a Laberca de Loreto.
Fa calor, caloriza…
As birabolas, a cual más pincha,
d’asti t’allá,
con muita faina.
L’aneda mira de que no beiga as crietas
(5 l’en i contau…)
As flors d’as pauls tambien medran por astí.
Ista mosqueta canta todo’l día,
encara qué, de maitín, le’n cuaca más.
Cucos n’hay a zientos, de muitismas colors.
O chorlitejo me se mira fito-fito
(por si las moscas)
Ista birabola está de buen año.
Tornan as garzetas, de Baldabra y d’a Sotonera.
Uyyy, l’alica qué quiere berendar…
¡Jibo!…ascape marcha o gallico de San Martín.
Cadaguno a lo suyo
¡qué aprobeite!
Parize mentira qu’en aiga
tanta de chen en iste terreno.
Será l’augua?
A tardi pasa amonico,
pero pasa.
Luego se’n irá a dormir o somormujo…
Y o zaguer rayez de sol
marchará por Torresecas.
De nueis,
solo qué se sentirán
granotas
y mochuelos.
Sagardiana
Tresoro d’augua en meyo’l secano
Por chinero n’a laberca
correderas
albarderos
mosquetas
abadejeros
anedas
alicachos de laberca
en o lugar de Loreto
Tresoro d’augua de la Isuela
en meyo’l secano.
Sagardiana
Tardada d’abiento n’a Plana de Uesca
N’a Laberca de Loreto
unos paxaros pasan os días.
Unatros, sólo que de paso
ta l’ibierno biben
con a machia de l’augua d’a Isuela
embalsada n’a Plana.
Por o cobalto d’os sasos de Banariés
y os campos de cantals de Cuarte,
a la tardada
esnabesan o zielo de Loreto
bandadas de grallas, bolacos e tordos
camín d’a ziudá.
A l’anochezida, no se siente cosa.
A la nana d’os carrizos de l’aberca
as anedas duermen.
E os paxaros suenian
pretos n’o pinar.
Sagardiana
Entre a luz e a guambra
S’esliza o tiempo con a Guatizalema.
Abonico marcha.
Sol a iste canto, al atro guambra.
Ta cutio’l río, con a ulor de Guara
cara t’abaxo marcha,
acarrazán as margens an son as yerbas.
A las trazas de l’augua
pasan os días n’as calendatas;
intes goyosos d’a luz que, amparan risas.
Foscos escais d’a sompra
que a tristera uloran.
Cuna ta un suenio de buro y piedra
tic-tac, tic-tac, tic-tac
Y no n’hay más.
Sagardiana
sagardiana 